លោក យ៉េង ឈាងលី ជាកូនកសិករម្នាក់ ស្ថិតក្នុងខេត្តកណ្តាល។ ឪពុកលោកបានចែកឋាននៅចុងឆ្នាំ២០០៨ បន្សល់ត្រឹមម្តាយ និងមានបងប្អូនប្រុស៣នាក់ ស្រី២នាក់ ហើយខ្លួនលោកជាកូនទី៥ក្នុងគ្រួសារ។

កាលនៅរៀនថ្នាក់វិទ្យាល័យ លោកបានចុះឈ្មោះចូលរៀនថ្នាក់បណ្តុះបណ្តាលវិជ្ជាតែងនិពន្ធរយៈពេលខ្លីពីសមាគមបណ្តុះបណ្តាលកវីជនបទ និងសមាគមអ្នកនិពន្ធខ្មែរ ក្រោមអាណត្តិដឹកនាំដោយលោកសាស្ត្រាចារ្យ យូ បូ (ចែកឋាន) លើជំនាញ មូលដ្ឋានគ្រឹះកំណាព្យខ្មែរ និងប្រលោមលោកខ្នាតវែង-ខ្លី ។ ក្រោយចប់បាក់ឌុប អំឡុងឆ្នាំ២០០៧ ឈាងលី បានបន្តការសិក្សាថ្នាក់ឧត្តមសិក្សានៅទីក្រុងភ្នំពេញ ដោយចាប់យកជំនាញ “គ្រប់គ្រង” នៅសាកលវិទ្យាល័យធនធានមនុស្ស។ នៅថ្នាក់មហាវិទ្យាល័យ ក្រោយទំនេរពីការងារនិងការសិក្សា លោក យ៉េង ឈាងលី តែងតែឆ្លៀតចូលរួមសិក្ខាសាលាតែងនិពន្ធជាច្រើនលើកច្រើនសា ដែលសិក្ខាសាលាទាំងនោះរៀបចំឡើងដោយសមាគមអក្សរសិល្ប៍ នូ ហាច សមាគមប៊ិកកម្ពុជា  និងកម្មវិធីផ្លាស់ប្តូរបទពិសោធនិពន្ធជាមួយកវី​​និពន្ធ​ក្រៅស្រុក រៀបចំដោយស្ថានទូតអាមេរិកប្រចាំនៅកម្ពុជា។ ក្រៅពីចូលរួមវគ្គបណ្តុះបណ្តាលលើវិជ្ជាតែងនិពន្ធដែលបង្រៀនដោយលោកគ្រូអ្នកគ្រូក្នុងស្រុក លោក ឈាងលី ក៏បានចូលរួមសិក្ខាសាលានិងវេទិកាអក្សរសិល្ប៍ក្នុងតំបន់​អាស៊ីអាគ្នេយ៍និងប៉ែកអឺរ៉ុបថែមទៀតផង។

ក្រោយបានប្រឡូកចូលក្នុងវិស័យតែងនិពន្ធនិងបានធ្វើការងារស្ម័គ្រចិត្តយ៉ាងច្រើនជាមួយកវីនិពន្ធខ្មែរនិង​បរទេស ទើបកំលុងឆ្នាំ២០១៦ លោក យ៉េង ឈាងលី បានសហការចងក្រងស្នាដៃកវីនិពន្ធទំនើបនិយមខ្មែរ ជាពីរភាសា(ខ្មែរ-អង់គ្លេស) ដោយដាក់ចំណងជើងស្នាដៃនោះថា ស្រមោល ឬ In the shadow ហើយបោះពុម្ព​ផ្សាយក្រោមជំនួយពីសមាគមអក្សរសិល្ប៍ នូ ហាច។ រឿងខ្លី រៀន…ភ្នែកនៅកញ្ចឹងក ត្រូវបានចេញផ្សាយក្នុងសៀវភៅកម្រងរឿងខ្លី វិធាវី២០១៦ និងត្រូវបានប្រែសម្រួលជាភាសាជប៉ុន។ កំណាព្យ ភ្លើងពណ៌ និងស្ត្រីអេត​ចាយ ក៏បានចេញផ្សាយជាភាសាអង់គ្លេសក្នុងសៀវភៅ Modern Literature of Cambodia (អក្សរសិល្ប៍ទំនើបនិយ​មកម្ពុជា) ស្នាដៃរឿងខ្លី ដើម្បី? និងកំណាព្យ ភ្លើងពណ៌ ត្រូវបានផ្សាយក្នុងសៀវភៅ Perjuangan Bangsa Dalam Puisi Dan Syair Asean ដែលជាកម្រងស្នាដៃកវីនិពន្ធអាស៊ាន កំលុងពេលមហោស្រពចម្រុះសិល្បៈ​​ក្នុងក្រុង​កូឡាឡាំពួ។ ដើមឆ្នាំ២០១៩ កំណាព្យ១០ចំណងជើង ចំណោមរាប់រយកំណាព្យ ដែលលោកបាននិពន្ធតាំងពីឆ្នាំ២០១២ដល់២០១៧ ត្រូវបានជ្រើសរើសដាក់ចូលក្នុងកម្រងស្នាដៃ Biennale of Asian Poetry ផ្សាយក្នុង​មហោស្រពកំណាព្យអាស៊ីរាល់ពីរឆ្នាំម្តង ក្នុងក្រុងញ៉ូវដេលី ប្រទេសឥណ្ឌា។

ដោយសារស្រឡាញ់ជាប់ចិត្តនឹងកិច្ចការនិពន្ធ និងចងក្រង នៅដើមឆ្នាំ២០១៨ លោកបានចូលរួម បម្រើការងារនៅគ្រឹះស្ថានបោះពុម្ពនៃសាកលវិទ្យាល័យ ម៉េងលី ជេ. គួច រហូតមកទល់នឹងបច្ចុប្បន្ននេះ៕

Email: chheangly.yeng@mjqeducation.edu.kh

Tel: 077 222 578 | 093 222 578